විප්ලව විලාපය

ලෝකය අසමබරයි

දුක දරන්නෝ බහුල කළ සැප විඳින්නෝ අල්පය

වියතක් තරම් වත් නොවන සාධාරණය

කුණු කොල්ලයට විකිණෙන්නේ

වෙන්දේසි කළ අසාධාරණයට ඉහළම ලංසු තබමිනි

විත්තිය වනාහි සමාජය නොව

අදෘශ්‍ය මාන බලවේගයන්ට නතුව ක්‍රියාත්මක වන්නාවූ සමාජ ක්‍රමයයි

ගඟ බොර දියෙනුත් වාසි කූනිස්සන්ටයි

දුක උරුම කුසට දුක අරුම කුහකයා පහර දෙන්නේ නීච ලෙසයි;

මෙම අධම සමාජ ක්‍රමය වෙනස් කළ හැක්කේ කාටද?

හිස් අහසට විදෙන දෙනෝදාහක් දුක් සුසුම්, සාප විලාපයන්

කෙදිනක හෝ කුහකයන්ගේ හිස් මත හෙණ පුපුරක් වී පතිත වේවි

නැඟෙන ගිනි පුළිඟු මත ඉදෙන බත් හැලියෙන්

දෙනෝදාහකගේ කුස නිසැකයෙන්ම පිරේවි